دهر جت

ترا دهرءَ جت
زمانگءَ دوردات
دهرجنت زمانگ پرّین اِیت
دلءَ میار !
دلءَمجیڑ
منءَ میار بارمگوش
منءَ میاریگ مکن
تئی درد منی دردانت
آ وژدلیں روچانی
سُهباں که سمین اتکگ
بانوری دُنءُ بُوّاں
کاڈاں په هلوهالو
نازینتگ وتی بانور
وشنام ات ۓ
آبادات ۓ
کتّاراِت اَنت یگدار
ریکانی سرءَ نرمیں
سُهبانی سرءَ هرروچ
درکپتگ مجید پلیں
گوں شیردلیں جانشواں
گوں برکت ءُ بهرامءَ
یگدار تیل اِت اِش چه ترماں
گرم داتگ مجیدءَ باردان
دیم په کولگرءِ شوهازءَ
وشّ اَََت آگلیں دهروشیں

یگدارکولگراں گوں اتکگ
انگرّءَ چتگ ملّیراں
وش اَت آگلیں دهروشیں
هوراں موسمی که گورتگ
سرّریتکگ اُمیتانی کور
شیرءُ ترونگلیں نوک آپءَ
نامان اَت گلیں دیواناں
هورگوں چرپکءُ یگداراں
وش اَت آگلیں دهروشیں
دهرءَ دیم وتی یگوّر کت
دوردات ۓ ترا اِے روچاں
موتکیگ اَنت
پرسیگ اَنت
گورم پرش اَنت گریواَنت
قندیلی نگنداَنت شهمے
ناں مردمی پاد برمشے
کورگریت
هورنال اِیت
سیرجاهءِ کرگ زهیروارانت
دهرءَ شر ترا گورگِند دات
دور دات ‎ۓ تراکورچاتاں
درداں گوں منال تو اینچو
ارساں ترونگلیں سهتے دار
که ارسانی تئی ترندیں هار
منءَ نیلبوئیں زرے بے گواه کنت
منءَ نیلبوئیں زرے بے گواه کنت
( صدیق سلیمی )